Nga Dash Frashëri

15 vjet “D.Kullolli Art – Studio”!

15 vjet më parë – në 2009 – ishte vetëm një projekt ambicioz. Sot, në vitin 2024 është një nga dyqanet më prestigjioze të materialeve të artit.

Dhe kjo falë përkushtimit të një artisti sipërmarrës vizionar. Dashnor Kullolli!

Një piktor i talentuar dhe njëherësh edhe biznesmen i suksesshëm.

Për të festuar 15-vjetorin e kompanisë së tij, Kullolli ka organizuar për ditën e sotme edhe dy pritje kortezie: një koktej para dyqanit të tij, në orën 18:00 dhe më pas, një darkë festive në orën 19.30, ku ai ka ftuar klientë artistë, por dhe dashamirës të artit.

***

Schmincke, Winsor&Newton,  Lefranc&Bourgeois, Sennelier, Da Vinci, Conte a Paris, Liquitex, Raphael, Arches, Isabey, Snazaroo, Mabef dhe… Dashnor Kullolli.

Janë emrat e markave dhe prodhuesve më të mëdhenj në botë të materialeve për artistët e arteve figurative.

Piktori Kullolli, i cili është diplomuar edhe si jurist i mirëpret me mirësjellje klientët e tij artistë dhe jo të tillë në “Perandorinë e Ngjyrave”, që ai ka krijuar tashmë prej 15 vjetësh.

“Pas kthimit nga Greqia, në vitin 2008, ku punova për disa vite si piktor, kryesisht me portrete në ishullin Zakinthos, u ktheva me synimin për të hapur një dyqan arti në Tiranë. Fillimisht, mendova ta bëja me piktura, duke ftuar edhe piktorë të tjerë për të ekspozuar punimet e tyre. Nisur edhe nga fakti që, materiale për artin nuk kishte, vendosa të hapja një të tillë. Kam një gamë të gjërë markash: Schmincke, Winsor&Newton,  Lefranc&Bourgeois, Sennelier, Da Vinci, Conte a Paris, Liquitex, Raphael, Arches. Kam filluar edhe me materialet e restaurimit, kornizat, etj..”, ka thënë Dashnor Kullolli gjatë një interviste për gazetën elektronike “Tirana Diplomat”.

I vetëdijshëm se një piktori i duhen bojëra cilësore, Kullolli ka lidhur kontrata eksluzive me prodhuesit më të mëdhenj dhe më të rëndësishëm në botë, duke sjellë prodhimet e tyre më të fundit, duke bërë herë pas here edhe oferta për klientët e tij.

***

“Musini”, sipas Kullollit janë ndër më cilësoret që ai ka në dyqanin e tij të artit.

“Musini janë prodhime gjermane të Schmincke, jashtëzakonisht cilësore”, thotë Kullolli.

Kompania franceze “Sennelier” e krijuar nga Gustave Sennelier prodhon materiale artistësh që nga viti 1887, pra 136 vjet më parë. Sa për kuriozitet podhon 50 tonalitetesh ngjyrash për pastelët e butë apo 70 lloj lapsash me ngjyra.

“Conte a Paris” prodhon qysh nga viti 1795, 228 vjet më parë, falë sipërmarrësit Nicolas Jacques Conté.

Edhe “Winsor & Newton” janë një markë cilësore.

Penelat janë kryesisht gjermanë.

***

Klientët janë të shumtë. Për të blerë materiale, apo për të bërë një kornizë pikture.

“Kam klientë thuajse të gjithë piktorët, jo vetëm nga Tirana, por dhe nga qytete të tjera. Po përmend vetëm disa, duke iu kërkuar falje të tjerëve: Alush Shima, Buron Kaceli, Gazmend Leka, Pashk Përvathi, Helidon Haliti, Artan Peqini, Ardian Isufi, etj.”, tha Kullolli.

Edhe klientela e huaj nuk mungon, të tillë si ukrainasi Ihor Yurchenko, apo spanjolli Cesc Farre.

Edhe unë jam klient i hershëm i “D.Kullolli Art Studio”.

Dashnor Kullolli është një piktor i talentuar, i cili jo vetëm e ndjen artin, por njeh më së miri edhe teknikat e ndryshme: vaj, akuarel, pastela, karbon apo laps.

Ai merr shpesh pjesë në “Kolonitë e Artit”, organizime të një grupi piktorësh që shkojnë së bashku në një destinacion të përbashkët për të pikturuar.

Merr pjesë në ekspozita arti kolektive.

Te “D.Kullolli Art Studio” praktikohen shumë studentë, por edhe të tjerë.

“Kjo tavalocë i përket një ta pasionuar pas pikturës, dhe është 6o vjeç. Arti nuk njeh moshë fillimi”, tha Kullolli për “Tirana Diplomat”.

Kavaletat dhe telajot janë gati për punët e radhës.

Në 2009 ishte një projekt ambicioz. Sot, në vitin 2024 është një dyqan prestigjioz i materialeve të artit në Shqipëri.

Gëzuar 15-vjetorin!