Piktori i njohur, Dritan Nasi, ka hapur ekspozitën e tij personale në Galerinë FAB, të titulluar “Metorite Times”.

Ekspozita është kuruar nga Dr. Ermir Hoxha.

Të gjitha pikturat vijnë si krijimtari e re e viteve 2023 -2024, dhe përfshijnë 20 piktura kompozime të përmasave të mëdha, me subjekt mitologjinë dhe reflektimet e saj në realitetin e sotëm. Hapja e ekspozitës u shoqërua me leksione të hapura mbi simbolikën e mitologjisë në art dhe mundësitë e përdorimit të saj në realitetin artistik të ditëve të sotme.

“Kjo ekspozitë është tërhequr nga historia dhe raportet që krijohen me të tashmen. Tani jam në një fazë që më pëlqen  të skicoj duke krijuar një sipërfaqe prozaike dhe lineare, duke u përpjekur ta ndërthur me poezinë e ngjyrave”, deklaron artisti.

Sipas tij “Meteorite times” rrëfen mbi një kohë relative dhe të thyeshme dhe në këtë rrëfim synohet të jepen mitet në historinë antike të vendit tonë dhe pasqyrimin e tyre në ditët e sotme.

Ekspozita është përpjekja për të realizuar krahas meditimit edhe komunikimin me gjithë publikun, duke përfshirë dhe studentët e Universitetit të Arteve, në lidhje me tematikën e miteve dhe të gjithë historisë që egziston në vendin tonë.

Ekspozita u organizua me mbështetjen e Ministrisë së Ekonomisë, Kulturës dhe Inovacionit.

“Çdo gjë njerëzore është thjesht një raport, raport mes perëndive, mes njerëzve dhe perëndive dhe mes njerëzve. Perënditë dashuronin, pëlqenin, tradhëtonin, hakmereshin dhe të gjitha këto raporte të ndërsjellta janë trasmetuar nga qielli drejt tokës dhe drejt njerëzores”, shkruan në tekstin shoqërues të eskpozitës, piktori Dritan Nasi.

“Ne Shqiptarët kemi lindur dhe jemi ritur në një tokë, ku nëntoka dhe mbitoka, është e mbushur me mite dhe legjenda antike. Të gjitha këto mite kanë simbolizmin e tyre fillestar, por dhe të cilat janë të lidhura dhe ndërthurura me historinë dhe me folklorin e popullit tone, nga antikiteti deri në ditët e sotme. Njohja e këtyre miteve dhe legjendave ndihmon edhe në kuptimin edhe interpretimin e jetës modern të ditëve të sotme. Mitologjia është e ndërthurur dhe prezente në të gjithë mënyrën e meditimit filozofik duke ndërtuar shumë steriotipe të profileve psikologjike”, thekson piktori Nasi.

Ekspozita ngjalli interesin e dashamirësve të artit, por dhe artistëve.