Nga Dash Frashëri

Piktori i mirënjohur, Pashk Pervathi, hapi ekspozitën personale “Adriatiko Joniane”, në galerinë e tij, “Galeria+”, në kryeqytet, e dyta e “Mjeshtrit të Madh”, përfshirë edhe atë në Lezhë me hapësirë më të madhe.

Një seri prej 50 peizazhesh të mrekullueshme, të realizuar me fokus detin dhe lojën e valëve me shkëmbinjtë.

Ekspozita do të qëndrojë e hapur, deri më 30 prill 2025.

***

Në ceremoninë e hapjes së ekspozitës te “Galeria+” morën pjesë artistë të njohur dhe dashamirës të arteve pamore, të tillë si Nikolin Ivanaj, Skënder Strica, Helidon Haliti, Mikel Temo, Arben Kristani, Sadik Kasa, Maks Bushi, Adrian Devolli, Flamur Vathi, Çaush Vathi, Zaim Elezi, Xheneta Kadillari, Agim Kadillari, Nasuf Myftari, Rikarda Nova Nënshati, Fatmir Toçi, Irena Toçi, Henri Çili, Agim Janina, Ylli Drishti, Tomë Therçaj, Shpend Topollaj, Oltsen Gripshi, Pandi Madhi, Alice Taylor, etj.

I pranishëm ishte dhe Kryetari i Bashkisë së Lezhës, Pjerin Ndreu.

Përvathi shprehu mirënjohjen e tij për pjesëmarrësit në ekspozitën e tij.

Ekspozita u pasqyrua edhe nga masmedia televizive, ku Përvathi dha edhe disa intervista

Ka një lidhje natyrore mes piktorit Përvathi dhe natyrës. Peizazhin e ka ngritur në një stad jo vetem të lartë profesional, por e ka evoluar përmes gjuhës artistike me të cilin ai e trajton.

Penelatat e shtrira, harmonia e ngjyrave, fraktura dinamike, loja e dritës ku jep një gjendje magjike peizazheve tij, me një identifikim të qartë të krijimtarisë së tij.

42 vjet më parë – në vitin 1983 – Përvathi hapi ekspozitën e parë personale në Galerinë e Artit të Lezhës. Qysh atëherë, Pashku ka hapur mbi 47 ekspozita personale deri në vitin 2025, ku 9 prej tyre jashtë shtetit, në Turqi, Itali, SHBA, Kosovë, Spanjë, etj.

Ekspozita e parë e tij në grup daton në vitin 1976 në Shtëpinë e Kulturës në Lezhë dhe duke marrë pjesë qysh atëherë, në rreth 60 ekspozita kolektive.

Veprat e tij përshkohen nga një vizatim ekspresiv dhe një kolorit i fuqishëm.

Disa nga punimet e ekspozitës

Përvathi vlerësohet nga studiuesit e artit si një nga personalitetet e peizazhit shqiptar.

***

Me dhjetëra qindra punë të realizuar thuajse nga çdo cep i Shqipërisë, të pasqyruar në katalogë të shumtë që mbajnë emrin e tij.

Peizazhet e tij të para datojnë 43 vjet më parë, në vitin 1980.

Madje, ndër të parët që koleksionoi një peizazh të Pashkut ishte shoku i tij i fëmijërisë, shkrimtari i njohur Preç Zogaj.

Rrugëtimi i piktorit Përvathi nuk ndalet vetëm brenda Shqipërisë. Ai ka shkelur me kavaletin e tij Italinë, Spanjën, Amerikën, Francën, Anglinë, Austrinë, Zvicrën, Kinën etj.

Vepra të tij sot janë pronë e koleksionistëve ne Evropë, Amerikë dhe Azi. Në fondin e Galerisë Kombëtare te Arteve ka tre vepra.

Më 28 dhjetor 2016 i akordohet Pashk Përvathi nga Presidenti i Republikës, Bujar Nishani, Urdhri “MJESHTËR I MADH”.

***

Për mua personalisht, si një dashamirës i arteve pamore, ishte një kënaqësi e jashtëzakonshme të isha i pranishëm në ceremoni.

Dhe të shijoja peizazhet e bukura të Pashkut!

***

Një vizitë e shpejtë edhe në galerinë e djalit të Pashkut, Admir Pervathit, i cili dallohet për koloritin e tij në punët me stil abstrakt.